التربيه الحديثه وليه انا ضد اني اربي بنتي على تربية اهلي⁉️

 كثير نسمع عبارة “وش فيها تربية زمان؟" 

وانا شخصيًا كبرت وانا دايم اخاف اغلط اخاف اقول رأيي اخاف أبكي او اطلب شي وكنت دايما اسمع مثل هالعبارات:

▪️“اسكتي لحد يسمع"

▪️“الكبار ما نرد عليهم"

▪️“عيب تعبرين عن رايك قدام الناس" والخ

ولما صرت أم قررت اوقف الحلقة هاذي لان كل هذي العبارات تخرب ثقة الطفل بنفسه وتعلمه انه ما له صوت وما له حق يعبر وانا مابي بنتي تكبر وهي تحس إنها لازم ترضي الناس وتسكت عن اللي يزعجها

وانا ما انكر فضل اهلي بس ابي اغير الحلقة ابي اكسر الدائرة اللي تمشي من جيل لجيل وابي بنتي تعيش بثقة تتكلم بدون خوف وتحب نفسها من كل قلبها وبصراحة التربية تطورت لأن الزمن تغير والعقول تغيرت واللي كان يعتبر تربية كويسة ومثاليه قبل؟ ممكن اليوم يترك أثر نفسي ما يروح حتى بعد ما نكبر ومع الأسف فيه كثير ناس فاهمه التربيه الحديثه غلط ويحسبونها دلع ، طيب صدق وش مفهوم التربيه الحديثه؟ باختصار هي طريقة تربية تعتمد على الوعي والاحترام والفهم النفسي للطفل يعني بدل ما نربي بعصبية او تقليد اعمى لتربية أهالينا نربي بناءً على فهمنا لطبيعة الطفل وعقله ومشاعره

🔍 وهذا مثال بسيط:

في دراسة من جامعة هارفارد اكتشفو ان الأطفال اللي اهلهم يتكلمون معهم باحترام حتى وقت الغلط يكبرون وهم قادرين يتخذون قرارات صح ويكونوا صحيين نفسيًا اكثر من غيرهم واقل عرضة للقلق والتوتر وكثير مشاكل نفسيه لان التعامل باحترام يعزز عند الطفل شعور الأمان وهذا ينعكس على شخصيته وسلوكياته لما يكبر

وكثير من الدراسات النفسية الحديثة تقول إن الطفل لما ينشأ في بيئة آمنة ومحبة يكون اكثر ثقة بنفسه واقل عرضة للاكتئاب وحتى في كورسات التربية الحديثة كثير يركزون على شي يسمونه “التواصل الفعّال” يعني بدل ما اقول “اسكت لا تصيح” اقول ادري انك زعلان بس تعال قولي ليه؟ لان مجرد تغيير الكلام بيغير سلوك الطفل

يعني الهدف من التربيه الحديثه هو نربي طفل قوي من داخل مو بس يسمع الكلام بسبب الخوف ونخليه يعرف يتحمل مسؤولية قراراته مو بس يطيع بدون ما يفهم والأهم نساعده يفهم مشاعره ويتعامل معها بدون كبت للمشاعر وبدون مقارنات❤️‍🩹🩹

نصايحي لكل الامهات والآباء:

▪️اسمعي طفلك ، احيانًا الطفل ما يبي شي الا اهتمام اسمعيه بدون مقاطعه خليه يحس إن له مساحة يعبر فيها بدون ما ينحكم عليه واذا تبينه يحترم الناس احترميه اول واذا تبينه يسمعك؟ اسمعيه

▪️قوليله “أنا فخوره فيك” لا تستنين كل شي بسيط يسويه يستاهل دعم وفرح

▪️علميه الحدود بحب ، مو لازم الصراخ والعقاب القاسي عشان يتعلم

▪️احترمي مشاعره ، حتى لو بكى على لعبه انكسرت هذا عالمه الصغير خليه يحزن 

▪️مو دايم تصححين لان الأطفال اوقات ما يحتاجون حل بس يبغون حضن وكلمة انا معك

▪️امدحي السلوك مو بس الشخصية ، بدال ما تقولين “انت شاطر” قولي انا فخورة انك شاركت العابك مثلا

✨

باختصار ما اطول عليكم ، اللي انا مؤمنة فيه ان الطفل ما يحتاج أم مثالية بالعكس يحتاج أم واعية ، والتربية الحديثة مو دلع ولا ضعف شخصية ، هي احتواء ومسؤولية ، واذا انا عانيت من اشياء بتربيتي وقت طفولتي مو معناتها ارجع اعيدها على طفلي ! انا مؤمنه ان كل جيل له طريقته وبنتي تستاهل اكون الجسر اللي يربطها بعالم وبيئه صحيه وتذكرو ان غلطة الطفل مو نهاية العالم والعقاب مو دايم هو الحل وفكرو في الموضوع بكل بساطه "أنا أربي انسان مو بس اعلمه يسمع الكلام" وبالنهايه هذا رأيي الشخصي علموني انتو وش رأيكم بالموضوع؟ 🤔