كيف اعرف الاندرتون حقي؟ واختار الوان مناسبه لي🎨💛

 قد شريتي فاونديشن او لبستي لون معين وقلتي لنفسك ليش احس شكلي باهت؟ 🤔 غالبا السبب هو انك ما تعرفين اندرتون بشرتك

بشرح لكم كل شي بطريقة مفهومه وبسيطة بس خلوني اشرح لكم وش يعني "اندرتون" ⁉️

الاندرتون هو اللون الداخلي لبشرتك مو اللون الخارجي ، حتى لو كنتي بيضاء او سمراء ممكن يكون عندك اندرتون مختلف عن غيرك وفيه ثلاث انواع

▪️اندرتون بارد ، اندرتون دافئ ، اندرتون محايد

طيب كيف اعرف لون الاندرتون حقي؟ هاذي طرق بسيطه جربوها وشوفو اي وحده تنطبق عليكم اكثر شوفي عروق يدك لو كانت زرقاء او بنفسجية ، انتي باردة واذا كانت خضراء ، انتي دافئة واذا مو قادره تفرقين بوضوح؟ غالبًا محايدة

والاكسسوارات، الذهب ولا الفضة؟ اذا يليق عليك الذهب؟ بشرتك دافئة واذا يليق عليك الفضة؟ معناتها بشرتك باردة ولو يليق عليك الاثنين معناتها محايدة 

طيب وش استفيد لو عرفت الاندرتون حقي⁉️

اذا عرفتي الاندرتون تقدرين تختارين الوان الملابس اللي تبرز ملامحك وتنور لك وجهك ، مثال:

وش يناسب الاندرتون البارد؟ الوان مثل الأزرق الملكي والبنفسجي والوردي البارد

والاندرتون الدافئ؟ الوان مثل الذهبي الزيتي الأصفر والبرتقالي والأحمر

واذا كان الاندرتون محايد؟ اغلب الألوان تليق عليك

من ناحية صبغات الشعر 💇🏻‍♀️

الدافئة يليق عليهم الاشقر الذهبي او البني العسلي

والباردة يليق عليهم الرمادي او الأشقر البلاتيني والاسود المزرق

واذا عرفتي اندرتون بشرتك بيصير سهل تختارين الوان تطلعك مشرقة حتى باصغر التفاصيل بتشوفين فرق مثل درجة البلشر والمناكير تخيلو؟

يعني مثلا لو انتي دافية درجات البلشر المشمشي او الخوخي بتناسبك اكثر ولو انتي بارده؟ اعتمدي الورديات

نصيحة بنات لا تمشون ورا الترند وبس!

اللي يطلع حلو على غيرك ممكن يبهتك انتي والعكس صحيح ، لذالك جربي وخذي وقتك وصوري نفسك باكثر من لون وشوفي وش اللي يناسبك ويخلي وجهك منور 🤍

تقدرون تشوفون مقاطع باليوتيوب ، او تجربون فلاتر خاصه تعلمك وش الألوان المناسبه لك او بالبيت تجربين بنفسك اكثر من لون لين تعرفين وش يناسبك اكثر وحتى من ناحية الميك اب احرصو تاخذون الفاونديشن المناسب لكم بناء على الاندرتون حقكم وجربو كل درجات البلشر او الأرواج وجربو كل انواع الميك اب لين تحصلون المناسب لكم واعتمدوه ✨

وتذكري ان جمالك بيطلع اكثر لما تعرفين نفسك وتفهمين وش اللي يليق عليك ويبرزك مثل ما انتي واختيارك الصح للألوان مو بس يجملك بيرفع ثقتك ويخلي طلتك تبان مرتبة بدون مجهود 💗