عنايتي بنفسي وقت الدوره الشهرية 🤫💖

تدرون ليش العنايه بنفسنا خصوصا وقت الدوره الشهريه مهمه؟ 🤔

لأن الجسم يكون بحالة حساسة والهرمونات تتغير والمزاج يتقلب والمناعة تضعف والإهمال وقت الدورة بيسبب لك مشاكل كثيره على المدى الطويل مثل تكيس المبايض أو اضطرابات الدورة أو حتى اكتئاب ومشاكل نفسيه! لان جسمك يتكلم وإذا ما سمعتيه؟ بيتكلم بطريقة أقسى بعدين

ما كنت أتوقع إن شيء نمر فيه كل شهر ممكن يغير نظرتي لنفسي بس الصدق؟ دورتي الشهرية كانت أحد الأسباب اللي خلتني اتقرب من جسمي أكثر وأفهمه وأقدره ولازم نتعامل مع الدوره بوعي مو كأنها “أيام مزعجة وخلاص بتعدي” جسمي تغير لما بدأت أهتم بنفسي بهالفترة ومزاجي صار افضل حتى نظرتي لنفسي تغيرت ومع الوقت تعلمت أشياء كثير عن العناية بنفسي بهالفترة وصرت أستغلها كفرصة للراحة والتنظيف الداخلي والاهتمام الخاص بنفسي ووقت الدوره الجسم يعيد فيه التوازن ويتنظف ويتخلص من السموم وبهالفتره جسمنا يحتاج مننا دعم مو إهمال وانا شخصيا؟ كنت بس اتحمل واحط اللوم على نفسي ومزاجي واكمل حياتي كأني مو محتاجة للراحه ما كنت منتبهه للعادات السيئة اللي كنت اسويها وهي قاعده تضرني بوقت الدوره مثل؛

قلة النوم والتوتر الزايد بسبب السهر لوقت طويل ، التغذيه السيئه مثل اكل السكريات والمقليات ونقص الحديد اللي كان مسبب خمول وصداع وتعب طول الوقت ، وقلة شرب المويه وكثرة شرب الكافيين بكل انواعه كنت اعشق اشرب القهوه والشاي الاخضر بشكل مبالغ فيه والخ ، كنت اسوي العادات السيئة هاذي سنين وكل شهر وقت الدوره؟ كنت أعاني من التعب والالم الجسدي والنفسي ويوم التعب زاد واستوعبت انه حقيقي قررت اوقف وأفهم "وش قاعد يصير فيني؟" لين بحثت وتثقفت اكثر عن الدوره الشهريه وايش التغييرات اللي تصير بجسمي وكيف اصير انسانه واعيه واهتم بنفسي وغيرت روتيني كامل.. وصرت اول يومين اريح نفسي قد ما أقدر البس لبس مريح واتدفى واشرب مشروبات دافية زي النعناع او الزنجبيل ، ومن اهم الأشياء اللي لاحظت فرقها الكبير هو نظام اكلي لما خففت السكر والاشياء الدسمه وصرت اكل سلطات خضار وفواكه والله الآلام خفت بشكل ملحوظ ! ونصيحتي لكم ركزو على الأكل اللي يدعم الحديد والمغنيسيوم زي السبانخ والتمر والموز والمكسرات ومن ناحية الراحة خذي بريك وخذي مساحتك وأجلي المهام الثقيلة ونظمي يومك على حسب طاقتك ومن ناحية النظافة والعناية غيري الفوط باستمرار وغسلي المنطقة بمويه دافيه والبسي ملابس قطنيه ومريحه وخلي جسمك يتنفس

✨

واخيرا من ناحية النفسية لا تحكمين على نفسك بهالفترة لان المزاج المتقلب طبيعي والتوتر طبيعي حتى البكاء طبيعي ، صدقيني الاشياء البسيطه هاذي تفرق كثير بعد ما تعتنين بنفسك صح بهالأيام بيصير كل شهر يمر عليك وانتي انسانه اقوى 💖💖💖