كيف اتعلم اي لغة بسرعه؟ 📚🧠

 كيف اتعلم انجليزي ، كوري ، ياباني ، هندي ، إسباني او اي لغة بالعالم بسرعه؟ بعطيكم الزبده كثير ناس يفكرون ان الموضوع معقد بس خلوني اقولكم شي من الاخر ، تعلم اللغات مو صعب بس يبيله ذكاء بالتعلم ✔️

انا بديت اتعلم انجليزي من عمر مره صغير يمكن بعمر خمس سنوات او اصغر والسبب لأني كنت احب اتفرج افلام كثير تخيلو؟ مثل بارني ، هانا مونتانا ، دريك اند جوش ، اي كارلي ، فيكتوريوس ، وغيره كثير ما كنت مثل باقي الأطفال اللي حولي كنت منجد مهتمه وفيني فضول ابي اعرف وش يقولون وش معنى الكلمات وليه ينطقون كذا ووش الفرق بين اللغات اصلا؟ وكنت دايما احاول اردد معهم الكلمات حتى لو ما كنت افهم كل شي بالبداية ومع الايام شفت نفسي افهم واتكلم لا شعوريا نفسهم ومن غير ترجمه صرت اكتب وحتى افكر بالانجليزي 🫢

وهالشي زاد من حماسي لتعلم اللغه اكثر وتخيلو كل هذا بدون معهد ولا دروس خصوصيه بس لاني بديت اسوي شي من كل قلبي ومن حبي وشغفي! ✨

بعد مرور السنين كبرت ودخلت جو وعالم جديد أسبانيا 🇪🇸 اللغة الإسبانيه؟ ما قد درستها ابد ولا كنت مخططة اتعلمها بس لأني احب ثقافتهم واحب اغانيهم واحب مسلسلاتهم صرت دايم اسمع واتفرج واردد معهم لين يوم من الأيام استوعبت اني افهم ٦٠٪؜ من المسلسل بدون ترجمة! يعني الصدق تعلمت اللغة من جوالي وتعلمت بسرعه لان فيه "شغف" ومن هنا نتعلم اذا ما تحب اللغة او ما عندك حماس وشغف ممكن الموضوع يطول شوي بس مو صعب ⏳اولا ، لا تحفظون الكلمات والقواعد قبل ما تعودون آذانكم على اللغة يعني مثلا اسمعو بودكاست او تابعو مقاطع باليوتيوب او افلام وشوفو الناس كيف تتكلم وكيف تنطق الكلمات وقلدوهم حتى لو ما تفهمون كل شي بالبدايه مع الوقت بيصير الموضوع مره سهل وراح تندمجون وتعيشون الجو مع اللغه وحاولو تكون اللغه حولكم طول الوقت لان هالطريقة تربط اللغة بالواقع وتصير اسرع بالحفظ واذا تعلمتو كلمة جديده مثلا نقول "مويه" حاولو دايما وانتو تشربون مويه ترددونها وتصنعون جمل من الكلمه مثل؛

This is water

Cold water

I drink water everyday 

I need some water

My body needs water 

Drinking water keeps my skin clear

الموضوع مره سهل وممتع بس اهم شي لا تضغطون على نفسكم مو لازم تختمون اللغه وتحفظون مية كلمة باليوم ترا عادي تتعلمون لو كلمتين يوميا اهم شي تستمرون ، واذا سمعتو كلمة جديده عليكم ما تعرفونها لا تتجاهلونها وقفو وابحثو عن معناها وبتنصدمون كيف مخكم يبدأ يربط بينها وبين كلمات ثانية 🪄🌍📚

ترا تعلم اللغات مو بس كلمات وقواعد وخلاص هو باب جديد يفتح لكم ثقافات ما كنتو تعرفونها وانا تعلمت لحالي واؤمن ان اي احد يقدر يوصل لو كان عنده شغف واستمر 💛