كيف نتعامل مع الشخص النرجسي؟😥

 تصدقون؟ في حياتنا ممكن نقابل اشخاص نحبهم ونتعلق فيهم وبعد فتره نكتشف ان تعاملهم معنا مليان تلاعب ومحاولة تحكم وكثير منهم ممكن يكونون نرجسيين‼️

لازم تعرفون مو دايم الشخص النرجسي يكون شخص عابر او زميل عمل او زوج وبس

احيانًا يكونوا الأم او الأب او الأخوان او حتى صديقات يعني ممكن يكون اي احد نعيش معه يوميًا وهنا المشكلة لأن الهروب مو خيار سهل والتعامل يحتاج وعي وذكاء عاطفي معهم وبشرح لكم كيف نعرفهم وكيف نقدر نتعامل معهم بدون ما نخسر نفسنا

الشخص النرجسي غالبًا يحب يكون دايم محور الاهتمام ويحس انه افضل من غيره ومستحيل يعترف باخطائه ويحب يستغل اللي حوله عشان يخدمون مصالحه الشخصيه وما يتعاطف مع مشاعر الناس وهذا اكثر شي يخوفني منهم ويخليني احط مسافه كبيره لان هو مو مجرد شايف نفسه وبس ، النرجسية نمط شخصية جدا معقد ومرهق ومتعب خصوصًا لو كان شخص قريب منك

طيب كيف نتعامل معهم؟🤔 

لازم تفهمون انكم ما تقدرون تغيرونهم ولا تغيرون شخصيتهم لان الشخص النرجسي ما يتغير الا اذا هو قرر هالشي يعني حاولو تتركون فكرة انا اقدر اغيره او اعدله لانه غالبًا بيتعبك بدون فايدة لان التعامل مع النرجسيين بيستنزف كل طاقتكم فضروري تهتمون براحتكم النفسية وتحطون حدود واضحه ولا تسمحون لهم يستغلون طيبتكم لان النرجسي دايما يحاول يخليكم تحسىن انكم الغلطانين حتى لو هو اللي غلط مستحيل يعترف عشان كذا خلكم واعيين وواثقين من نفسكم ولا تسمحون لأي احد يتحكم بمزاجكم لان النرجسي بيحس بالانتصار انه قدر يتحكم بنفسيتك وترا النرجسيين يحبون يستفزونك بالكلام واذا عصبتي او دافعتي عن نفسك بقوه بيقولون انك حساسة او درامية وقاعده تبالغين! عشان كذا خلكم هاديين عندهم ولا تعطونهم اكبر من حجمهم

ولو كان الشخص مو من العائلة او مو قريب منكم حاولو تحطون مسافة بينكم بس لو كان شخص مقرب منكم ومجبورين تتعاملون معه؟ الافضل العلاقة تكون رسميه ، مو لازم نشارك كل تفاصيل التفاصيل معهم ومو غلط اننا نحاول نحمي نفسنا الغلط اننا نضحي براحتنا وصحتنا عشان نرضي شخص ما يشوف الا نفسه

مختصر كلامي ، مو لازم تقطعون الناس عشان تحمون نفسكم ، بس لازم تحطون "حدود واضحة" ولا تنسون الاشياء هاذي خط احمر ، راحتكم ونفسيتكم غير قابلين للتفاوض اختارو نفسكم دائمًا ❤️‍🩹