هل حب الذات انانيه؟ 🤔⁉️

 وش معنى حب الذات؟ وهل الشخص اللي يحب نفسه  صار اناني ونرجسي؟

اولاً لازم نعرف ان حب الذات مو شي انتي تطلبينه من الناس ، هو شي تعطينه لنفسك بمعنى انك تعرفين قيمتك وتعرفين متى تقولين اي ومتى تقولين لا وتختارين وش يناسبك حتى لو زعلوا الناس وفيه فرق كبير بين الأنانية وحب النفس!

▪️الأنانية = تاخذين بدون ما تعطين بالمقابل ويهمك نفسك وبس

▪️حب الذات = تحبين نفسك عشان تقدرين تحبين غيرك بطريقة سليمه وصحيه وتعطين نفسك حقّها بدون ما تضرين أحد ولازم نفهم انه مو عيب ولا غلط نحط حدود ، الغلط انك تذوبين عشان ما تزعلين خاطر احد على حساب سعادتك ونفسيتك

✨

خذيها قاعده ، محد بيهتم فيك أكثر منك واذا حبيتي نفسك مو معناتها انتي نرجسيه او مغروره بالعكس بس فيه كثير ناس خصوصًا البنات يمرون بلحظات يحسون فيها بالذنب إذا رفضوا احد او يخافون يقولون “لا” عشان ما يزعل اللي قدامهم حتى لو كانوا هم اللي يتأذون ، وانا شخصيا؟ اي كنت وحده منهم

كنت من النوع اللي دايم يحط الأولويه لكل احد قدامي من اهلي ، صديقاتي ، شغلي ، وحياتي ووقتي كله يصير للكل بس أنا؟ دايما بالأخير ، لين جاء يوم وحسيت إني خلاص تعبت نفسيا ووقتها جتني لحظة ادراك اني قاعده اعيش اشياء فوق طاقتي صرت أعصب بدون سبب مزاجي متقلب ما أطيق أحد ، هنا وقفت وسألت نفسي ليه قاعده اسوي بنفسي كل هذا؟ اكتشفت إني أنسى نفسي دايما عشان محد يزعل مني وكنت أشوف ان التضحية هي طيبة ولأني احب الخير للكل ، بس مع الأسف اكتشفت مو الكل يبادلني نفس المشاعر وان فيه ناس صارت تستغل هالشي! ومن هنا قررت أتغير وبديت اتعلم شوي شوي وش يعني “حب الذات” وصار عندي مبدأ: 

✨أنا مو إنسانه أنانية ، أنا إنسانة لها قيمة ، وتستاهل تحب نفسها بدون شروط✨

كيف احب نفسي؟ 🫂🫀

▪️اسألي نفسك وش يسعدني ويفرحني؟

خذي وقتك وسوي أشياء بسيطة تحبينها مثل كوب قهوة ، كتاب ، طلعة مع نفسك لمكان تحبينه او مع ناس تسعدك ، اهدي نفسك ورد ، عادي دلعي نفسك بدون سبب ولا تنتظرين من احد يمدحك عشان تحسين بقيمتك! حب النفس يبدأ من الاهتمام بالأشياء الصغيرة

▪️"سامحي نفسك على الماضي"

كلنا نغلط لا تجلدين نفسك وقولي “تعلمت من تجاربي والحين بصير شخص افضل" واسمحي لنفسك تجربين من جديد

▪️"اقطعي العلاقات السامه واللي تقلل منك"

بعدي عن الناس السلبيه واللي يقللون منك أو يحسسونك إنك دايم مقصرة؟ ما لهم مكان ، حطي حدود للعلاقات اللي تأذيك ولا تقارنين نفسك بأحد دايما أقولكم كل أحد يمشي بطريق مختلف وكل احد وتجاربه الشخصيه

✨

طيب كيف أقول لا؟ بدون زعل أو إحراج؟

▪️كلمة “لا” مو معناتها انك مو طيبة او شخص سيء ، انتي بس قاعده تحمين نفسك ، مو غلط ولا عيب لو تكلمنا وعبرنا او رفضنا شي ما نقدر عليه او فوق طاقتنا ، حاولي ما تشرحين كثير بس قولي “ما أقدر” أو “مو مناسب لي” وخلاص لان التبرير الزايد بيخليك تتوهين وحاولي تبدئين بجملة لطيفة وخليك ثابته وواضحه زي مثلاً:

“اقدر انك فكرتي فيني بس صراحة ما يناسبني”

"أحتاج أرتب وقتي فما راح أقدر أشارك”

دايما تذكري انك تستحقين تهتمين بنفسك واللي يحبك؟ بيتفهم بدون زعل ، لا تسمحين لأحد يلومك لأنك اهتميتي بنفسك لان حبك لنفسك بيخليك قوية من داخل وواثقه وراضية عن نفسك وثابتة حتى لو الناس تغيروا عليك ، ولا تحسين بالذنب إذا قررتي تختارين راحتك لأن أكثر العلاقات الصحية تبدأ من حبك وثقتك بنفسك 💗💗💗