وش الجانب الثاني من الأمومه؟ الاكتئاب والرضاعه الطبيعيه 🥺🍼

 الأمومة شي عظيم ، بس؟ محد يقول لنا عن الجانب الثاني من الموضوع عن التعب والتغيرات النفسيه والجسدية ، والحزن اللي ممكن يجينا بدون سبب أنا بعد ولادتي مريت بمرحلة ما كنت أفهم نفسي كنت أضحك وأبكي بنفس اللحظة وطول الوقت ما لي خلق  أحد ومع ذالك أحاول أكون افضل أم لبنتي

اكتئاب ما بعد الولادة⁉️

تجربتي مع اكتئاب ما بعد الولادة كانت صعبة نوعا ما وأول ما ولدت بنتي كوكو كنت متحمسة وكل شي تمام لكن بعد كم أسبوع بدأت أحس إني مو نفسي!! وانا مو انا فعليًا كنت احس بثقل بصدري

كنت تعبانة ، محبطة ، وما عندي طاقة وكنت أحس بالذنب وتجيني افكار وأوهام سلبية واللي ساعدني أتخطى الاكتئاب تماما هو إني اعترفت إني محتاجة مساعدة وتكلمت مع زوجي والناس المقربه مني وهم وقفوا معي ، برضو كنت اتكلم مع ناس مرت بنفس تجربتي وكنت ابحث واقرأ كثير عن اكتئاب ما بعد الولادة وهالشي ساعدني كيف أفكر بطريقة إيجابية وكيف أتعامل مع مشاعري ، برضو بدأت أهتم بنفسي شوي شوي مثلا رجعت أمارس رياضة خفيفة ، واهتميت بتغذيتي كل يوم كنت أحاول أخصص وقت لي لو حتى نص ساعة أسوي فيها شي أحبّه او اسوي أشياء جديده تبهرني وتسعدني ، مثلا اروح مكان جديد اقرأ كتاب جدید اتابع مسلسل جديد أو حتى أجرب اكل جديد والخ ، وكلنا عندنا اشياء تسعدنا أو طرقنا الخاصه وتدريجياً ، بدأت أحس اني قاعده أرجع احسن وأفضل ، المهم إن الوحدة ما تحس إنها وحيدة في هذي التجربة والدعم والمساعدة ضروريين ولازم نكون صبورات على أنفسنا واليوم الحمدلله أقدر أقول إني تخطيت هالفترة الصعبة وصرت أقوى منها ، بعطيكم نصايح من كل قلبي والكلام اللي بقوله جدا ساعدني اني أتغير واصير شخص افضل مو عشاني وبس عشان روحي وقلبي بنتي 🤍✨

▪️تكلمي ، لا تكتمين بقلبك وشاركي مشاعرك واحاسيسك مع اي شخص قريب منك حتى لو اللي قاعده تحسينه بسيط عبري او اكتبي المهم اللي بقلبك يطلع وما يبقى شي بخاطرك والكلام بيخفف كثير

▪️خذي راحتك وخذي وقتك مو لازم تكونين مثاليه طول الوقت ، وتذكري وقت النفاس هو وقت راحة لك ، مو وقت للضغط او الإنجاز 

▪️لا تقارنين نفسك نهائياً مع باقي الامهات لان كل أم تختلف وكل وحده ورحلتها وكل شخص يختلف ولا تخلين السوشال ميديا يضغط عليك اكثر مافي احد يطلع الجوانب السلبيه اللي بحياته كامله ومافي احد حياته مثاليه من الاساس

▪️كوني لطيفه مع نفسك وتقبلي مشاعرك لا تلومين نفسك على كل شي ، عادي اذا بكيتي هذا مو معناه انك ام سيئه ، انتي توك والده ولسا جسمك ونفسيتك ما تعافت 🥹🙏

▪️مارسي الاشياء اللي تحبينها ، تعلمي شي جديد او جربي اكله جديده ، اطلعي مكان جديد او تابعي مسلسلات ، بودكاست ، كتب اي شي جديد وممتع ، مارسي رياضه لانها تغير كثير بالنفسيه ، ارقصي ، سوي اي شي بالحياة يسعدك المهم تشغلين وقت الفراغ بشي يسعدك وينفعك.

الرضاعة الطبيعية⁉️

من أكثر الأشياء الصعبة اللي مريت فيها كأم جديدة كانت صعوبة الرضاعة الطبيعية وكنت مصدومه ليه محد يتكلم عن هالشي او يعطي هالموضوع اهتمام؟💔

من ناحية الألم في الصدر والتعب وقلة النوم وتأنيب الضمير لان مرات ممكن تحسين إن الحليب ما يكفي أو إن الطفل ما يشبع وهذي المشاعر طبيعية طبعا لكن انا شخصيا محد قالي هذا كله لين جربت بنفسي وتعلمت وأحب أقولكم على بعض النقاط والنصائح المهمه أول شي مهم إنك تتعلمين الوضعيات الصحيحة للرضاعة اللي تريحك وتريح طفلك سواء كنت جالسة أو مستلقية المهم تكونين مرتاحة ، ثاني شي ترطيب جسمك مهم عشان يظل عندك حليب كافي حاولي تشربين مويه طول اليوم واكيد تغذيتك مهمة جدا أكلك الصحي يأثر على الحليب حاولي تاكلين أكل متوازن فيه فيتامينات ومعادن

والراحة والنوم شي ضروري حاولي تنامين وقت ما ينام طفلك حتى لو كان نومك متقطع عشان تحافظين على طاقتك ، أنا شخصيا بالبداية حسيت بتعب وضغط كبير وحتى كانت تجيني اوقات كنت أفكر أوقف الرضاعه الطبيعيه بس مع الوقت وبعد ما شفت كيف بنتي تستفيد من الحليب الطبيعي وبعد ما بحثت عن فوائده قررت أستمر مهما كانت التحديات وعرفت إن الرضاعة الطبيعية هي الأفضل لصحة بنتي وقررت أتمسك في هالقرار لأنها تستحق كل التعب وابي الأفضل لها ولا تنسون الدعم من العائلة او استفسري من الأمهات اللي عندهم خبرة ومع الوقت والصبر بتصير الرضاعة الطبيعية أسهل وبتحسين بالفخر إنك قادرة تقدمين لطفلك الأفضل ، وهاذي نصايح فادتني من ناحية الرضاعه الطبيعية؛

▪️إذا واجهتي صعوبه بالرضاعه وعندك القدره استعيني بمستشارة رضاعه طبيعيه او دكتورتك او حتى اليوتيوب فيه كثير مقاطع مفيده بتساعدك

▪️احرصي على شرب الماء الترطيب مهم وبيساعد بإدرار الحليب ، لا ترضعين وانتي جوعانه ولا تهملين اكلك لان له تأثير كبير

▪️الوضعيه الصحيحه = يعني رضاعه مريحة

▪️فكري في لحظات الرضاعه لما طفلك يحس بالأمان معك لما يكون قريب منك ويسمع دقات قلبك يتعرف على ريحتك ، هاذي اللحظات كلها تبني رابطه قويه وعظيمه بينك وبينه 👩🏻‍🍼❤️‍🩹

▪️عادي ترضعين طبيعي او حليب صناعي او تجمعين بينهم المهم راحتك انتي وصحة طفلك لا تحسين بالذنب انتي أم رائعه بكل الحالات

النهايه:

يمكن الأمومة مو دايم وردية مثل ما نتخيل ويمكن تمرين بلحظات ضعف تبكين فيها بس صدقيني كل يوم يمر انتي تقوين أكثر حتى لو تحسين العكس لا تقسين على نفسك

"تذكري انك مو لوحدك وإنك مو ضعيفه ، انتي قاعده تمرين بمرحلة حساسه جدا واللي تسوينه شي عظيم".

بالنهايه راح تعدي هالمرحله وبتكونين أقوى بكثير مما تتخيلين. 🤍🫂🩹